Sunday, November 27, 2016

Terbinafine Axapharm (tableta)

Çfarë është Terbinafin Axapharm dhe kur përdoret?
Tabletat Terbinafin Axapharm merren për trajtimin e mikozave të lëkurës, qimeve dhe thonjëve me recetë të mjekut.

Çfarë duhet të vihet re gjatë kësaj?
Për trajtimin e suksesshëm të mikozës do të duhej t’i respektoni disa rregulla:
Në pjesët e rrobave që kanë rënë në kontakt me lëkurën e sëmurë mund të mesin të ngjitura shkaktarët e mikozave. Prandaj duhet që këto rroba t’i ndërroni çdo ditë.
Lëkura normale dhe para së gjithash e thatë është mbrojtja më e mirë nga mikozat. Për këtë arsye në pjesët e infektuara të lëkurës duhet të shmangen rrobat e ngushta apo rrobat që lejojnë vetëm pak depërtimin e ajrit. Po ashtu duhet që pas larjes të thahet me kujdes pjesa e infektuar e lëkurës. Peshqirët duhet të ndërrohen çdo ditë.
Nëse vuani nga një mikozë e këmbës, nuk do të duhej të ecni këmbëzbathur.
Kështu pengoni bartjen e mëtejshme të mikozave.

Kur nuk duhet të përdoret Terbinafin Axapharm?
Terbinafin Axapharm nuk duhet të përdoret, nëse gjatë trajtimeve të mëparshme me Terbinafin Axapharm apo preparate të ngjashme janë shfaqur alergji.
Ngaqë deri tani ekzistojnë pak përvoja me Terbinafin Axapharm gjatë trajtimit të mikozave tek fëmijët nën 5 vjeç (pesha trupore nën 20 kg), këta nuk duhet të marrin Terbinafin Axapharm.

Kur është i nevojshëm kujdesi gjatë marrjes së Terbinafin Axapharm?
Nëse vuani nga funksioni i kufizuar i veshkës, duhet t’i tregoni për këtë mjekut tuaj para marrjes së Terbinafin Axapharm.
Ju lutemi t’i tregoni mjekut tuaj menjëherë, kur tek ju konstatoni simptome si të pështjellët e vazhdueshëm, mungesë e oreksit, lodhje, vjellje, dhimbje në pjesën e sipërme të djathtë të stomakut, verdhëz, ngjyrosje e errët e urinës apo jashtëqitje me ngjyrë të çelur, ngaqë këto mund të jenë shenja për një çrregullim të rëndë të mëlçisë. Po ashtu është i rëndësishëm informimi i mjekut, nëse duhet të merrni veç kësaj edhe ilaçe për trajtimin e sëmundjeve të stomakut apo sëmundje infektive.
Nuk preferohet marrja e Terbinafin Axapharm tek pacientët me sëmundje kronike apo aktive të mëlçisë.
Informojeni mjekun apo farmacistin tuaj nëse vuani nga sëmundje të tjera, keni alergji apo merrni apo përdorni nga jashtë ilaçe të tjera, posaçërisht disa ilaçe kundër depresioneve ose sëmundjeve të tjera neurologjike (të ashtuquajtur antidepresivë triciklikë, inhibitorë selektivë kundër ripranimit të serotoninës apo MAO-inhibitorë të tipit B) si dhe disa ilaçe kundër tensionit të lartë të gjakut (të ashtuquajtur betabllokues) ose kundër çrregullimeve të ritmit të zemrës ose edhe ilaçe të blera vetë.

A duhet të përdoret Terbinafin Axapharm gjatë shtatzënisë apo në kohën e dhënies së gjirit?
Gjatë shtatzënisë Terbinafin Axapharm mund të merret vetëm me udhëzimin e theksuar të mjekut.
Terbinafin Axapharm depërton në qumështin e nënës.
Prandaj nënat që marrin Terbinafin Axapharm nuk duhet të japin gji.

Si ta përdorni Terbinafin Axapharm?
Nëse nuk është udhëzuar ndryshe nga mjeku, dozimi i zakonshëm për të rritur është një tabletë prej 250 mg në ditë.
Dozimi për fëmijë sipas udhëzimit të mjekut.Tabletat duhet të merren të palluara me lëngje. Efikasiteti i Terbinafin Axapharm nuk pengohet nga marrja e njëkohshme e ushqimit, kështu që ai mund të merret gjatë ushqimit. Mjeku do të vendosë rreth kohëzgjatjes së terapisë. Marrja e rregullt e Terbinafin Axapharm është vendimtare për suksesin e trajtimit.Mos e ndryshoni vetvetiu dozimin e udhëzuar. Nëse besoni se ilaçi po ndikon tepër dobët apo tepër fort, atëherë flisni me mjekun apo farmacistin tuaj.

Cilat efekte anësore mund t’i ketë Terbinafin Axapharm?
Gjatë marrjes së Terbinafin Axapharm mund të shfaqet këto efekte anësore:
Më së shpeshti u raportua për ankesa në stomak dhe zorrë (ndjenja e ngopjes, humbja e oreksit, të pështjellë, djegësirë stomaku, dhimbje të lehta të stomakut, bark), urtikaria, dhimbje të muskujve dhe nyjave si dhe dhimbje të kokës. Informojeni mjekun nëse shfaqet njëra prej ankesave të përmendura.
Rrallë u vërejtën çrregullime të shqisave të shijimit (deri tek humbja e ndjenjës së shijimit), të cilat zhduken pas ndërprerjes së Terbinafin Axapharm, sipas rregullit pas disa javësh pas përfundimit të trajtimit.
Në raste të rralla është e mundur që trajtimi me Terbinafin Axapharm të sjellë çrregullime të rënda të mëlçisë, të cilat shprehen me simptome si të pështjellë që zgjatë dhe nuk sqarohet, dhimbje të stomakut, humbje e oreksit, lodhje e pazakonshme, vjellje, dhimbje në pjesën e sipërme të djathtë të stomakut, verdhëz (ngjyrosje e verdhë e syve ose e lëkurës), ngjyrosje e errët e urinës ose jashtëqitje me ngjyrë të çelur, që mund të shpie deri në zvogëlimin e tipave të caktuara të qelizave të gjakut, të cilat shprehen me simptome si dhimbje të fytit me temperaturë/ethe, gjakderdhje të pazakonshme, hematome, ose deri në rrebulla të rënda të lëkurës si dhe me paraqitjen më të hershme apo më të fortë të Lupus erythemones kutan ose Lupus erythemones sistematik (një sëmundje autoimune që sulmon vende të shumta të trupit).
Informoje mjekun apo menjëherë po qe se shfaqet njëra nga ankesat e përmendura.
Nëse gjatë trajtimit shfaqet një ngjyrosje e verdhë e lëkurës apo e syve ose një ngjyrosje e pazakonshme e errët e urinës ose jashtëqitje me ngjyrë të çelur, atëherë duhet të ndërpritet trajtimi dhe të lajmërohet menjëherë mjeku.
Në rastet shumë të rralla u vërejt rënie e flokëve, edhe pse deri tani nuk mund të sqarohej një lidhshmëri me Terbinafin Axapharm.
Shumë rrallë u vërejtën raste të tejndjeshmërisë ndaj dritës dhe përkeqësim i një psoriaze. Një lidhshmëri me marrjen e Terbinafin Axapharm nuk mund të tregohej deri më tani.
Nëse vëreni ndikime anësore që nuk janë përshkruar këtu, do të duhej ta informoni mjekun apo farmacistin tuaj.

Çfarë duhet të vini re përveç kësaj?
Ilaçi duhet të përdoret vetëm deri në datën e shënuar në paketim me „EXP.“.
Ilaçi duhet të ruhet në vende që nuk mund t’i mbërrijnë fëmijët, në temperaturë të dhomës (15 – 25°C) i mbrojtur nga drita në paketimin origjinal.
Informata të mëtejme ju jep mjeku apo farmacisti juaj.
Këta persona kanë informata të hollësishme profesionale.

Çfarë përmban Terbinafin Axapharm?

Tabletat Terbinafin Axapharm 125: 1 tabletë përmban 125 mg terbinafinë si substancë aktive dhe substanca ndihmëse.

Tabletat Terbinafin Axapharm 250: 1 tabletë përmban 250 mg terbinafinë si substancë aktive dhe substanca ndihmëse.

Ku mund të merrni Terbinafin Axapharm?
Cilat paketime ekzistojnë?
Në farmaci vetëm me recetë të mjekut.

Tabletat Terbinafin Axapharm me 125 mg (për përdorim tek fëmijët): paketime me 14 tableta (të ndashme).

Tabletat Terbinafin Axapharm me 250 mg: paketime me 14 dhe 28 tableta (të ndashme).
Share:

Shqiperia JO Duhanit

Blog Archive